रोजगारी सिर्जनामा जोड: नेशनल लघुवित्तले सञ्चालन गर्‍यो दुना–टपरी तालीम

दिप न्यूज

समाचार प्रकाशित मिति :

२६ माघ २०८२, आईतवार १७:२०

बेलौरी, कञ्चनपुर ।नेशनल लघुवित्त वित्तीय संस्था लिमिटेड, शाखा कार्यालय बेलौरी कञ्चनपुरको आयोजनामा दुना–टपरी तालीम सञ्चालन गरिएको छ। शनिबार बेलौरी नगरपालिका–९, रामघाटमा रहेको सिर्जनाशील महिला दुना–टपरी उद्योगको कार्यालयमा तालिम सम्पन्न भएको हो।

शाखा प्रमुख बमकृष्ण वलीको अध्यक्षतामा सुरु भएको कार्यक्रममा बेलौरी नगरपालिका वडा नं. ७ का वडाध्यक्ष प्रकाश श्रेष्ठ प्रमुख अतिथिका रूपमा सहभागी हुनु भएको थियो। कार्यक्रममा अन्तरानी थारुले स्वागत मन्तव्यद्वारा उपस्थित सबैलाई स्वागत गर्नुभएको थियो भने कार्यक्रमको सञ्चालन लोक ठगुन्नाले गर्नुभएको थियो।

तालिम कार्यक्रममा जम्मा ४१ जनाको सहभागिता रहेको थियो। दुना–टपरी निर्माणसम्बन्धी तालिम सिर्जनाशील महिला दुना–टपरी उद्योगकी अध्यक्ष सुनिता देवी चौधरी, सचिव रामकली चौधरी तथा उद्योगका अन्य सदस्यहरूले प्रदान गर्नुभएको थियो।

कार्यक्रममा बोल्दै प्रमुख अतिथि प्रकाश श्रेष्ठले नेशनल लघुवित्त वित्तीय संस्था लिमिटेडले समाजमा सकारात्मक र उदाहरणीय काम गर्दै आएको बताउनुभयो। उहाँले यस्तो सीपमूलक तालिमले बेरोजगारी न्यूनीकरण गर्दै रोजगारी सिर्जना गर्न सहयोग पुग्ने र वडा तथा नगरपालिकाको तर्फबाट पूर्ण सहयोग रहने प्रतिबद्धता व्यक्त गर्नुभयो। साथै, आगामी दिनमा यस्ता कार्यक्रमहरू नगरपालिकाभर विस्तार गर्दै लैजाने कुरामा जोड दिनुभयो।

नेशनल लघुवित्त वित्तीय संस्था लिमिटेडले आफ्ना ग्राहक सदस्यहरूलाई विभिन्न प्रकारका सीपमूलक तालिम तथा वित्तीय साक्षरता कार्यक्रमहरू प्रदान गर्दै आएको छ। संस्थाले सदस्यहरूलाई व्यवसायमुखी तथा लघुउद्यमी बनाउने उद्देश्यका साथ अन्य लघुवित्त संस्थाभन्दा फरक र प्रभावकारी ढंगले काम गर्दै आएको जनाएको छ।

प्लास्टिक प्रयोगको सट्टा वातावरणमैत्री दुना–टपरीको प्रयोगलाई प्रवर्द्धन गर्ने उद्देश्यसमेत संस्थाले लिएको छ, जसले वातावरण संरक्षणमा पनि योगदान पुर्‍याउने विश्वास लिइएको छ।