रानाथारु संस्कृति संरक्षण र आत्मनिर्भरता दुवैको जोड : बेलौरीमा घंघरिया–अंगिया बनाउने तालिम सम्पन्न

दिप न्यूज

समाचार प्रकाशित मिति :

२३ बैशाख २०८२, मंगलवार १८:०३

नवराज अवस्थी, बैशाख २३, बेलौरी कञ्चनपुर — “सीप सिकौं, आत्मनिर्भर बनौं” भन्ने मूल नारासहित बेलौरी नगरपालिकाले लघु उद्यम विकास कार्यक्रम (MEDPA) अन्तर्गत आरक्ष पीडित बस्तीका महिलाहरूलाई लक्षित गरी सञ्चालन गरिएको घंघरिया–अंगिया सिलाइ तालिम मंगलबार सम्पन्न भएको छ।

बेलौरी नगरपालिका–३ मा आयोजित उक्त तालिम ४५ दिनसम्म सञ्चालन गरिएको थियो। कार्यक्रममा कुल १० जना महिला सहभागी थिए, जो सबैजना आरक्ष पीडित बस्तीबाट आउनु भएको हो। उनीहरूलाई थारु समुदायको मौलिक पहिरन घंघरिया र अंगिया बनाउने सीप प्रदान गरिएको थियो।

तालिमको समापन कार्यक्रममा प्रमुख अतिथिको रूपमा नगरप्रमुख पोतिलाल चौधरीले सहभागीसँग अन्तक्र्रिया गर्दै यस्ता कार्यक्रमहरू महिलाहरूको सशक्तिकरण र संस्कृतिको संरक्षण दुवैमा सहायक हुने बताए। उनले सीप विकासका यस्ता प्रयासहरूलाई आगामी दिनमा अझ प्रभावकारी बनाइने उल्लेख गरे।

सहभागी महिलाहरूले तालिमले आफूहरूमा आत्मविश्वास बढाएको र स्वरोजगारको मार्ग प्रशस्त भएको प्रतिक्रिया दिएका थिए। तालिम सम्पन्न भएसँगै सहभागीहरूलाई प्रमाणपत्र वितरण गरिएको थियो।

कार्यक्रम बेलौरी नगरपालिका कार्यालयको आयोजनामा सम्पन्न भएको हो।