नेशनल लघुवित्त वित्तीय संस्था लिमिटेड शाखा कार्यालय बेलौरीद्वारा कृषि सहायतामा विशेष छुट कार्यक्रम सम्पन्न

दिप न्यूज

समाचार प्रकाशित मिति :

१३ माघ २०८१, आईतवार २०:४७

माघ १३, बेलौरी। कञ्चनपुर जिल्लाको बेलौरीमा रहेकोे नेशनल लघुवित्त वित्तीय संस्था लिमिटेड शाखा कार्यालय बेलौरी आयोजनामा “दिलिप एग्रोभेट सेन्टर बेलौरी” र “नेशनल लघुवित्त वित्तीय संस्था लिमिटेड शाखा कार्यालय बेलौरी” बिच कृषि सहायता कार्यक्रम सम्पन्न भएको छ।

आइतबार महाकाली बहुमुखी क्याम्पस बेलौरीको सभाहलमा आयोजित कार्यक्रमको प्रमुख अतिथि बेलौरी नगरपालिकाका नगरप्रमुख पोतीलाल चौधरी रहनुभएको थियो। अतिथिहरूमा नगर प्रवक्ता हर्कबहादुर भुल, विपद् व्यवस्थापन शाखा प्रमुख अशोक पाण्डे, व्यवसायी जलबहादुर चौधरी, पूर्व बेलौरी उद्योग वाणिज्य संघ अध्यक्ष लक्ष्मीनारायण चौधरी, स्थानीय बुद्धिजीवी, शिक्षक, व्यापारी तथा नेशनल लघुवित्तका सदस्यहरू गरी जम्मा ७१ जना सहभागी थिए।

कार्यक्रम शाखा प्रमुख बमकृष्ण वलीको सभापतित्वमा सञ्चालन गरिएको थियो। प्रमुख अतिथि नगरप्रमुख चौधरीले किसानहरूको हितका लागि कार्यक्रमलाई अझै विस्तार गर्नुपर्नेमा जोड दिनुभयो। उहाँले नगरपालिकाले सदैव किसानहरूको पक्षमा सहयोग गर्ने प्रतिबद्धता व्यक्त गर्दै संस्थासँग सहकार्य गरी परिचयपत्र वितरण र कृषि सहायता कार्यक्रमलाई व्यापक बनाउनुपर्नेमा विशेष ध्यान दिने बताउनुभयो।

शाखा प्रमुख वलीले संस्थाले आगामी दिनमा यस्ता सामाजिक कार्यक्रमलाई थप प्रभावकारी बनाउने तथा सदस्यहरूलाई लघुउद्यमीका रूपमा स्थापित गर्न वित्तीय साक्षरता कार्यक्रमलाई प्राथमिकतामा राख्ने जानकारी दिनुभयो।

कार्यक्रममा जलबहादुर चौधरीले सदस्यहरूलाई सम्झौताअनुसारको छुट प्रदान गर्दै कृषि क्षेत्रमा सहयोग विस्तार गर्ने धारणा राख्नुभयो।

कार्यक्रम हिराकुमारी चौधरीको स्वागत मन्तव्यबाट सुरु भई लोक ठगुन्नाले सञ्चालन गर्नुभएको थियो। कार्यक्रमले किसानहरूमाझ विशेष महत्व राख्ने र संस्थाको आगामी कार्यक्रमहरूलाई थप प्रेरणा प्रदान गर्ने अपेक्षा गरिएको छ।