नेशनल लघुवित्त वित्तीय संस्था लिमिटेड शाखा कार्यालय बेलौरीद्वारा समूह अध्यक्ष कार्यशाला तथा वित्तीय साक्षरता कार्यक्रम सम्पन्न

दिप न्यूज

समाचार प्रकाशित मिति :

२९ फाल्गुन २०८१, बिहीबार १९:०९

नवराज अवस्थी, फागुन २८,कञ्चनपुर ।।।नेशनल लघुवित्त वित्तीय संस्था लिमिटेड, शाखा कार्यालय बेलौरी, कञ्चनपुरद्वारा विभिन्न समूहका अध्यक्षहरूका लागि समूह अध्यक्ष कार्यशाला गोष्ठी तथा वित्तीय साक्षरता कार्यक्रम सम्पन्न गरिएको छ। शाखा प्रमुख बमकृष्ण वलीको स्वागत मन्तव्यबाट सुरु भएको थियो।

उक्त कार्यक्रमको अध्यक्षता समुह न.१७ को समुह अध्यक्ष भागीरथ ऐर ले गर्नुभएको थियो भने प्रमुख अतिथि बेलौरी नगरपालिकाका नगरप्रमुख पोतिलाल चौधरी रहनुभएको थियो भने विशिष्ट अतिथिको रूपमा अनुगमन कार्यालय अत्तरियाका अनुगमन अधिकृत अमरेश कुमार कुसवाहा रहनुभएको थियो। अन्य अतिथिहरूमा पशु शाखा प्रतिनिधि पुष्पराज पाण्डे, कृषि शाखा प्रतिनिधि हरिस सेटी, उद्योग वाणिज्य संघका अध्यक्ष हिरा सिंह बिष्ट, इलाका प्रहरी कार्यालय बेलौरीका प्रतिनिधिहरू वीरसिंह धामी र गोविन्द बहादुर कुँवर, बेलौरी नगरपालिकाका नगरप्रमुखका सचिव तथा स्थानीय बुद्धिजीवीहरू रहनुभएको थियो। कार्यक्रममा समूहका अध्यक्षसहित ६६ जनाको सक्रिय सहभागिता रहेको थियो।

कार्यक्रममा उत्कृष्ट समूह तथा सदस्यहरूलाई सम्मान गरियो। उत्कृष्ट समूहको रूपमा भुमिका चैवनी महिला समूह (समूह नं. ९५) प्रथम, कमरी महिला समूह (समूह नं. ४१) दोस्रो, तथा पुरैन महिला समूह (समूह नं. ८५) तेस्रो स्थान हासिल गर्न सफल भए। साथै, उत्कृष्ट बचत सदस्यका रूपमा सीता डगौरा, सफल उद्यमीका रूपमा महारानी रानी (समूह नं. ९८) तथा कुमारी निर्मला भण्डारी (समूह नं. १७) लाई पुरस्कृत गरियो।

कार्यक्रममा वित्तीय साक्षरता अन्तर्गत कर्जा, बचत, बीमा, कर्जा सदुपयोगिता, संस्थाका नीति-नियमहरू तथा बचतको महत्त्व जस्ता विषयमा व्यापक छलफल गरिएको थियो। अनुगमन अधिकृतले संस्थाको कार्यक्षेत्र, परिचय तथा प्रगति विवरणबारे जानकारी गराउनु भयो भने शाखा प्रमुखले शाखाको कार्यक्षेत्र, प्रगति विवरण र भावी रणनीति प्रस्तुत गर्नुभयो।

कार्यक्रमका प्रमुख अतिथि नगरप्रमुख पोतिलाल चौधरीले नेशनल लघुवित्तले गरिब तथा विपन्न वर्गको आर्थिक सशक्तीकरणका लागि प्रभावकारी कार्य गरिरहेको बताउँदै सदस्यहरूले लिएको कर्जाको पूर्ण सदुपयोग गरी कृषि तथा उद्यम विकासमा लाग्नुपर्ने सुझाव दिनुभयो। साथै, लघुवित्त संस्था, नगरपालिका र सहकारीहरूले सहकार्य गर्दै अघि बढ्नु आवश्यक रहेको उहाँले जोड दिनुभयो।

समुदायमा वित्तीय चेतना अभिवृद्धि गर्न र उद्यमशीलता प्रवर्द्धन गर्न नेशनल लघुवित्तको यो पहल महत्वपूर्ण रहेको सहभागीहरूले व्यक्त गरेका छन्।