बेलौरीमा माओवादी केन्द्रको दोस्रो नगर सम्मेलन सम्पन्न, पुनः लाल बहादुर चौधरीको नेतृत्वमा नयाँ समिति चयन

दिप न्यूज

समाचार प्रकाशित मिति :

२७ असार २०८२, शुक्रबार २३:१४

कञ्चनपुर, असार २७ – नेपाल कम्युनिस्ट पार्टी (माओवादी केन्द्र) बेलौरी नगर समितिको दोस्रो नगर सम्मेलन शुक्रवार एक भव्य कार्यक्रमकाबीच सम्पन्न भएको छ।

बेलौरी उद्योग वाणिज्य संघको सभाहलमा सम्पन्न सम्मेलनको उद्घाटन केन्द्रीय सदस्य तथा संविधान सभा सदस्य टेकेन्द्र प्रसाद भट्टले गरेका थिए। उद्घाटन सत्रमा नगरका वडास्तरीय संगठन, जनवर्गीय इकाइ, विभिन्न तहका कार्यकर्ता तथा प्रतिनिधिहरूको उल्लेखनीय उपस्थिति रहेको थियो।

विधिवत उद्घाटनपछि सम्मेलन सांगठानिक समीक्षा, आगामी कार्ययोजना निर्माण तथा नेतृत्व चयन प्रक्रियामा केन्द्रित भयो। सम्मेलनले पुनः लाल बहादुर चौधरीको अध्यक्षतामा ४० सदस्यीय नगर समिति सर्वसम्मत रूपमा चयन गरेको छ।

नवगठित समितिमा उपाध्यक्षहरूमा रामप्रकाश बडायक र शारदा चौधरी, सचिवमा सुन्दर चौधरी, सहसचिवमा राजु कुवर, र कोषाध्यक्षमा झकबहादुर शिरिस चयन भएका छन्। बाँकी सदस्यहरू विभिन्न वर्ग, समुदाय तथा भूगोलबाट समावेश गरिएको जनाइएको छ।

नव निर्वाचित अध्यक्ष लाल बहादुर चौधरीले दोस्रो कार्यकालमा प्रवेश गर्दै संगठनलाई अझ सुदृढ र जनमुखी बनाउने प्रतिबद्धता व्यक्त गरेका छन्।

सम्मेलनको समापन सत्रमा बधाई, शुभकामना तथा संगठन सुदृढीकरणका एजेन्डाहरू प्रस्तुत गरिएका थिए।