बेलौरी नगरपालिकाविरुद्ध बेलौरी–६ निवासी केशव बोहराद्वारा शान्तिपूर्ण आमरण अनशनको घोषणा

दिप न्यूज

समाचार प्रकाशित मिति :

२१ माघ २०८२, मंगलवार १६:४४

महेन्द्र भाट, माघ २०, बेलौरी (कञ्चनपुर) बेलौरी नगरपालिका–६ निवासी स्थानीय अभियन्ता केशव बोहरा ले बेलौरी नगरपालिकामा वर्षौंदेखि व्याप्त भ्रष्टाचार, बेथिति, कुशासन, कानुनविपरीत तथा अपारदर्शी रूपमा गरिएका करार कर्मचारी नियुक्ति, अलपत्र परेका विकास संरचना, सार्वजनिक सम्पत्तिको दुरुपयोग तथा सूचनाको हकबाट आम नागरिकलाई जानाजानी वञ्चित गरिएको आरोप लगाउँदै शान्तिपूर्ण आमरण अनशनको घोषणा गरेका छन्।

बोहराका अनुसार नगरपालिकासँग सम्बन्धित यस्ता गम्भीर विषयहरूमा पटक–पटक सम्बन्धित निकायको ध्यानाकर्षण गराउँदा पनि समयमै कुनै सुनुवाइ नभएपछि बाध्य भई आमरण अनशन बस्ने निर्णय लिनुपरेको हो।

नेपालको संविधानको धारा १७ ले प्रत्याभूत गरेको शान्तिपूर्ण रूपमा भेला हुने अधिकार, अभिव्यक्ति स्वतन्त्रता तथा सूचनाको हकअनुसार अनशन पूर्ण रूपमा अहिंसात्मक, शान्तिपूर्ण र कानुनसम्मत ढंगले सञ्चालन गरिने उनले जानकारी दिए।

उनले यो आन्दोलन कुनै व्यक्तिगत स्वार्थ, पद, लाभ वा प्रतिशोधका लागि नभई सुशासन, पारदर्शिता र जवाफदेहिता सुनिश्चित गर्न तथा बेलौरी नगरपालिकाका आम नागरिकका हक–अधिकारको संरक्षणका लागि गरिएको स्पष्ट पारे।

“बेलौरीका आम जनताको आवाज दबाउन सकिँदैन,” बोहराले भने, “हाम्रा जायज मागहरू पूरा नभएसम्म यो संघर्ष अविचलित रूपमा जारी रहनेछ।”

आमरण अनशन बेलौरी बजारस्थित भीमदत्त चोकको पिपल चौतारामा सुरु गरिने जनाइएको छ। घटनापछि स्थानीय राजनीतिक, सामाजिक तथा नागरिक वृत्तमा चासो बढेको छ।