नोभा हस्पिटलको बेलौरीमा निःशुल्क स्वास्थ्य शिविर सम्पन्न, २०९ जना लाभान्वित

दिप न्यूज

समाचार प्रकाशित मिति :

१२ माघ २०८१, शनिबार १९:३९

नवराज अवस्थी, माघ १२, बेलौरी कञ्चनपुर

ग्रामीण क्षेत्रका नागरिकहरूको स्वास्थ्यमा सहज पहुँच पुर्‍याउने उद्देश्यले आज बेलौरी नगरपालिकाको वडा नं. २ मा एकदिने निःशुल्क स्वास्थ्य शिविरको आयोजना गरिएको छ। नोभा अस्पताल प्रा.लि. धनगढीको सहकार्यमा सम्पन्न यस शिविरमा २०९ जना स्थानीय बासिन्दाले सेवा लिएका छन्। यसमा १४४ पुरुष र ५५ महिलाले स्वास्थ्य सेवा प्राप्त गरेका थिए।

शिविरमा बेलौरी नगरपालिकाका नगरप्रमुख पोतिलाल चौधरी रहनु भएको थियो। उद्घाटन कार्यक्रममा उहाँले यस्ता कार्यक्रमले ग्रामीण भेगका नागरिकलाई स्वास्थ्य सेवामा सहज पहुँच दिलाउन महत्वपूर्ण योगदान पुर्‍याउने बताउनुभयो। साथै, उहाँले यस्ता शिविरलाई आगामी दिनमा पनि निरन्तरता दिइने प्रतिबद्धता व्यक्त गर्नुभयो।

शिविरमा डा. ललित चौधरी (हाडजोर्नी तथा नसा रोग विशेषज्ञ) र डा. हरिस जोशी (एमबिबिएस) सहितको अनुभवी चिकित्सकहरूको टोलीले बिरामीहरूको जाँच र उपचार गरेका थिए। घुँडाको दुखाइ, हाडजोर्नी समस्या, नशासम्बन्धी रोग र मेरुदण्डका समस्याबाट पीडित बिरामीहरूलाई बायोरोस उपकरणको प्रयोग गरेर विशेष उपचार प्रदान गरिएको थियो। साथै, बिरामीहरूलाई आवश्यक परामर्श र औषधि वितरणसमेत गरिएको थियो। स्वास्थ्य शिविरमा निःशुल्क औषधि वितरण रहेको थियो। शिविरमा आएका बिरामीहरूलाई थप उपचारका लागि हस्पिटल आएमा ओपिटी सेवा निःशुल्क रहने र अन्य शुल्कमा २०% छुट समेत रहेको अस्पतालका व्यवस्थापक पदमराज भट्टले बताउनुभएको छ।

बेलौरी वडा नं. २ का अध्यक्ष कलवीर चौधरीले शिविर सफलतापूर्वक सम्पन्न गर्न सहयोग गर्ने सबैलाई धन्यवाद व्यक्त गर्दै भन्नुभयो, “यस शिविरले हाम्रो वडाका नागरिकहरूको स्वास्थ्यमा सकारात्मक प्रभाव पारेको छ। दुर्गम क्षेत्रका नागरिकलाई स्वास्थ्य सेवा उपलब्ध गराउन यस्ता शिविरहरूले ठूलो राहत पुर्‍याउँछन्। आगामी दिनमा पनि यस्ता कार्यक्रमलाई निरन्तरता दिन वडाको तर्फबाट सहयोग गरिनेछ।”

शिविर बिहान ११ बजे सुरु भई दिनभर सञ्चालन भएको थियो। स्थानीय बासिन्दाहरूको उत्साहजनक सहभागिताले कार्यक्रमलाई अझ प्रभावकारी बनाएको आयोजक संस्थाहरूले जनाएका छन्।

स्थानीय बासिन्दाहरूका अनुसार, यस्ता कार्यक्रमले स्वास्थ्य समस्या पहिचान र समाधानमा ठूलो सहयोग पुर्‍याउँछ। “घरमै आएर उपचार सेवा दिनु हाम्रो लागि ठूलो राहत हो,” एक सहभागीले भने।

नोभा अस्पताल प्रा.लि., धनगढी र बेलौरी नगरपालिका वडा नं. २ को संयुक्त पहलमा सम्पन्न यो शिविरले दुर्गम क्षेत्रका नागरिकलाई स्वास्थ्य सेवाको पहुँच पुर्‍याउने दिशामा सकारात्मक उदाहरण प्रस्तुत गरेको छ। आयोजकहरूले आगामी दिनमा यस्ता थप कार्यक्रमको योजना बनाइएको जानकारी गराएका छन्।

कार्यक्रमको समापनमा आयोजकहरूले सबै सहभागी र सहयोगीलाई धन्यवाद दिँदै यस्ता कार्यक्रमलाई अझ प्रभावकारी बनाउन सामुदायिक सहयोगको आवश्यकता रहेको औँल्याए।