सामुदायिक हितमा अमर गोकुल बन समितिको अनुकरणीय योगदान

दिप न्यूज

समाचार प्रकाशित मिति :

३ श्रावण २०८२, शुक्रबार १०:५०

साउन १ पुनर्बास कंचनपुर ,पुनर्बास नगरपालिका–११, अमरबस्तीमा रहेको अमर गोकुल सामुदायिक उपभोक्ता बन समितिले सामाजिक सेवा र सामुदायिक विकासमा महत्वपूर्ण योगदान पु‍र्‍याउँदै चारवटा स्थानीय समितिहरूलाई एक लाख दश हजार रुपैयाँ बराबरको आर्थिक सहयोग हस्तान्तरण गरेको छ। समितिको यस पहललाई सामुदायिक उत्थानमा नयाँ ऊर्जा दिने कदमका रूपमा हेरिएको छ।

एक विशेष कार्यक्रममार्फत जडिबुटी खेती गर्ने कृषक समूहलाई रु. २०,०००, अक्सिजन व्यवस्थापन समितिलाई रु. २०,०००, डोकेबजार खानेपानी समितिलाई रु. २०,००० र जीविकोपार्जन उपसमितिलाई रु. ५०,००० का दरले नगद तथा चेक वितरण गरिएको हो। सहयोग प्राप्त गर्ने सबै समितिहरू आ–आफ्नो क्षेत्रको सुधार र समुदायको हितमा सक्रिय भूमिका खेल्दै आएका छन्।

कार्यक्रममा बोल्दै समितिका अध्यक्ष मान बहादुर थापाले समुदायको समग्र विकास नै समितिको मूल लक्ष्य भएको स्पष्ट पारे। उनले भने, “हामी जनताको सेवा, सहयोग र सहभागितामा विश्वास राख्छौं। बन संरक्षण मात्र होइन, जनजीवनमा सकारात्मक परिवर्तन ल्याउनु पनि हाम्रो जिम्मेवारी हो।” थापाले स्थानीय स्रोतसाधनको सदुपयोगद्वारा जीवनस्तर उकास्न सकिनेमा पूर्ण विश्वास व्यक्त गरे।

स्थानीयवासीहरूले समितिको यस कार्यको प्रशंसा गर्दै कृषि, स्वास्थ्य, खानेपानी तथा जीविकोपार्जनका क्षेत्रमा कार्यरत समूहहरूलाई थप प्रेरणा मिलेको प्रतिक्रिया दिएका छन्। यस्तो पहलले पारदर्शिता, स्थानीय नेतृत्वको सुदृढीकरण र स्रोतको प्रभावकारी उपयोगप्रति समुदायको विश्वास अझ प्रगाढ बनाएको छ।

यसैक्रममा, अमर गोकुल बन समितिले आगामी आर्थिक वर्षमा विद्यालय, मठ–मन्दिर, डिके–२ को विद्युत् लाइन विस्तार, गुम्बा लगायतका सामाजिक तथा धार्मिक संस्थाहरूलाई समेत सहयोग गर्ने घोषणा गर्दै समग्र विकासमा निरन्तर योगदान दिने प्रतिबद्धता व्यक्त गरेको छ। समितिको यो कार्यले पुनर्बास क्षेत्रलाई आत्मनिर्भर र समृद्ध बनाउने यात्रामा थप गति दिने विश्वास गरिएको छ।