बेलौरी नगरपालिकाद्वारा श्रम विवाद रोकथाम सम्बन्धी अन्तरक्रिया सम्पन्न

दिप न्यूज

समाचार प्रकाशित मिति :

२४ माघ २०८२, शुक्रबार ००:२१

नवराज अवस्थी, माघ २२, बेलौरी, कञ्चनपुर।।

बेलौरी नगरपालिकामा श्रम ऐन तथा श्रम विवाद रोकथाम सम्बन्धी सरोकारवालाहरूसँग अन्तरक्रिया कार्यक्रम सम्पन्न भएको छ। “विवादको साटो मेलमिलापको बाटो” भन्ने मूल नारासहित आयोजित कार्यक्रममा श्रमिक र रोजगारदाताबीच उत्पन्न हुने विवादलाई कानुनी झमेलाभन्दा आपसी समझदारी र मेलमिलापमार्फत समाधान गर्नुपर्नेमा जोड दिइएको छ।

बेलौरी नगरपालिकाको न्यायिक समितिको आयोजनामा सम्पन्न उक्त कार्यक्रममा स्थानीय श्रमिक, रोजगारदाता, व्यवसायी, कानुन व्यवसायी, सामाजिक अभियन्ता तथा सरोकारवाला निकायका प्रतिनिधिहरूको सहभागिता रहेको थियो।

कार्यक्रमका प्रमुख प्रशिक्षक परमानन्द भट्टले श्रम ऐनका प्रमुख प्रावधान, श्रम विवादका सामान्य कारण, स्थानीय तहको भूमिकासहित विवाद रोकथामका उपायबारे प्रशिक्षण दिनुभयो। उहाँले श्रम विवादलाई समयमै संवाद र मेलमिलापबाट समाधान गर्न सके औद्योगिक शान्ति कायम हुनुका साथै श्रमिक–रोजगारदाता सम्बन्ध सुदृढ हुने बताउनुभयो।

कार्यक्रममा सहभागीहरूले श्रम ऐनको प्रभावकारी कार्यान्वयन, श्रमिक अधिकारको संरक्षण र स्थानीय तहमार्फत न्यायिक पहुँच विस्तार गर्न यस्ता अन्तरक्रिया कार्यक्रम आवश्यक रहेको धारणा राखेका थिए।

बेलौरी नगरपालिकाको न्यायिक समितिले आगामी दिनमा पनि श्रम तथा सामाजिक न्यायसँग सम्बन्धित चेतनामूलक कार्यक्रमलाई निरन्तरता दिने जनाएको छ।