श्री सिद्धेश्वरी माविमा भर्ना अभियान कार्यक्रम सम्पन्न

दिप न्यूज

समाचार प्रकाशित मिति :

१८ चैत्र २०८१, मंगलवार ०९:०९

चैत्र १८,बेलौरी, कञ्चनपुर – “गुणस्तरीय शिक्षा, सबल भविष्य” नाराका साथ बेलौरी नगरपालिका-१० स्थित श्री सिद्धेश्वरी माध्यमिक विद्यालयले शैक्षिक सत्र २०८१ को भर्ना अभियान कार्यक्रम भव्य रूपमा सम्पन्न गरेको छ। विद्यार्थी भर्ना वृद्धिको रणनीति तय गर्ने, विद्यालयको शैक्षिक गुणस्तर अभिवृद्धि गर्ने तथा शिक्षालाई समुदायमुखी बनाउने उद्देश्यका साथ विद्यालय प्राङ्गणमा संयुक्त भेला तथा विचार गोष्ठी आयोजना गरिएको थियो।

कार्यक्रम विद्यालय व्यवस्थापन समिति (वि.व्य.स.) का अध्यक्ष अर्जुन बहादुर सिंहको अध्यक्षतामा सम्पन्न भएको थियो। प्रमुख अतिथिका रूपमा बेलौरी नगरपालिका वडा नं. १० का अध्यक्ष सोमलाल चौधरी रहनुभएको थियो भने विशिष्ट अतिथिका रूपमा नगरपालिकाका शिक्षा शाखा प्रमुख अमित प्रसाद भट्टको विशेष सहभागिता रहेको थियो। विद्यालयका प्रधानाध्यापक, शिक्षक, अभिभावक, विद्यार्थी, समाजसेवी तथा स्थानीय बुद्धिजीवीहरूको उल्लेखनीय उपस्थिति रहेको यस कार्यक्रममा विद्यालय सुधार, विद्यार्थी भर्ना प्रवर्द्धन, र गुणस्तरीय शिक्षाका विषयमा गहन छलफल गरिएको थियो।

कार्यक्रमलाई सम्बोधन गर्दै प्रमुख अतिथि चौधरीले शिक्षा नै सशक्त समाज निर्माणको मूल आधार भएको बताउँदै विद्यालय सुधारका लागि समुदायको भूमिका महत्त्वपूर्ण रहेको उल्लेख गर्नुभयो। विद्यालयले विद्यार्थी भर्ना वृद्धिमा विशेष ध्यान दिनुपर्ने भन्दै उहाँले नगरपालिकाको तर्फबाट आवश्यक सहयोग र सहकार्य प्रदान गरिने प्रतिबद्धता व्यक्त गर्नुभयो।

विशिष्ट अतिथि शिक्षा शाखा प्रमुख भट्टले विद्यालयमा गुणस्तरीय शिक्षा प्रवाह गर्न स्थानीय तह, अभिभावक र विद्यालय प्रशासनको समान सहभागिता आवश्यक रहेको बताउनुभयो। उहाँले भर्ना अभियानलाई प्रभावकारी बनाउन नगरपालिकाले आवश्यक स्रोतसाधन तथा नीति निर्माणमा सहयोग गर्ने बताउँदै सामुदायिक विद्यालयहरूलाई शिक्षाको स्तर वृद्धिमा प्रेरित गर्नुपर्नेमा जोड दिनुभयो।

कार्यक्रममा सहभागी अभिभावक, शिक्षक, र सरोकारवालाहरूले विद्यालयको शैक्षिक गुणस्तर सुधार गर्नुपर्ने आवश्यकता औंल्याएका थिए। विद्यालय व्यवस्थापन समितिले भर्ना अभियानलाई सफल बनाउन अभिभावकहरूसँग प्रत्यक्ष सम्पर्क गर्ने, विद्यालयका भौतिक संरचना तथा शिक्षण सिकाइका प्रविधिहरूलाई प्रभावकारी बनाउने तथा विद्यार्थीहरूको सर्वांगीण विकासमा ध्यान दिने योजना अघि सारेको जानकारी गराएको थियो।

श्री सिद्धेश्वरी माध्यमिक विद्यालयले यस भर्ना अभियानलाई सफल बनाउन अभिभावक, शिक्षाविद् तथा स्थानीय निकायसँग सहकार्य गर्दै समुदायलाई शिक्षाको महत्त्वबारे सचेत गराउने जनाएको छ। विद्यालय परिवारका अनुसार, आगामी दिनमा अझ प्रभावकारी योजनाहरू कार्यान्वयन गर्दै विद्यालयलाई आधुनिक, प्रविधिमैत्री तथा प्रतिस्पर्धात्मक बनाउने लक्ष्य लिइएको छ।

शिक्षालाई सबैको पहुँचमा पुर्याउन तथा शिक्षाको स्तर अभिवृद्धि गर्नका लागि गरिएको यो अभियानले अभिभावक तथा स्थानीय समुदायलाई पनि सकारात्मक रूपमा प्रभावित गर्ने विश्वास गरिएको छ।