ताल तथा सिमसार क्षेत्रमा पाइने चरा संरक्षण कार्यक्रम सम्पन्न

दिप न्यूज

समाचार प्रकाशित मिति :

१५ माघ २०८१, मंगलवार १४:१५

नवराज अवस्थी, १४ माघ २०८१, बेलौरी कञ्चनपुर : ताल तथा सिमसार क्षेत्रको जैविक विविधता संरक्षणका लागि विशेष महत्व राख्ने “चरा संरक्षण कार्यक्रम” सोमबार बेलौरीको अमर स्मृति सामुदायिक वन उपभोक्ता समितीको कार्यालयमा भव्यताका साथ सम्पन्न भएको छ। कञ्चनपुर पन्छी संरक्षण समूहका अध्यक्ष सन्देश चौधरीको अध्यक्षतामा सम्पन्न उक्त कार्यक्रममा बेलौरी नगरपालिकाका उप-प्रमुख जोगराम चौधरी प्रमुख अतिथि रहेका थिए।

कार्यक्रमका प्रमुख अतिथि उप-प्रमुख जोगराम चौधरीले ताल तथा सिमसार क्षेत्रको संरक्षण सबैको साझा दायित्व भएको बताएका थिए। उनले भने, “ताल तथा सिमसार क्षेत्रमा पाइने चराहरू हाम्रो पर्यावरणीय सन्तुलनका लागि महत्त्वपूर्ण छन्। यसको संरक्षणले जैविक विविधताको जगेर्ना मात्र होइन, पर्यटक आकर्षणमार्फत स्थानीय आर्थिक विकासमा पनि योगदान पुर्याउँछ। नगरपालिकाले यस्तो महत्त्वपूर्ण कार्यमा सदैव साथ र सहयोग गर्ने प्रतिबद्धता व्यक्त गर्दछ।”

विशिष्ट अतिथि कुण्डा सब-डिभिजन वन कार्यालयका वन अधिकृत दिनेश कुमार यादवले सिमसार क्षेत्रमा चराको संरक्षणका लागि समुदायको सक्रिय सहभागिता र सचेतना अत्यावश्यक भएको बताए। उनले भने, “चराको संरक्षणले सिमसार क्षेत्रको जैविक प्रणालीलाई सुदृढ बनाउनेछ। सिमसार क्षेत्र केवल चराहरूको बासस्थान नभई, स्थानीय जीवनशैली र प्राकृतिक सम्पदाको महत्त्वपूर्ण अंश हो। यस क्षेत्रलाई सुरक्षित राख्न सामुदायिक वन, स्थानीय निकाय र सुरक्षा निकायबीच सहकार्य आवश्यक छ।”

कार्यक्रममा बेलौरी नगरपालिकाका वडाध्यक्षहरू, वडा सदस्यहरू, सामुदायिक वनका प्रतिनिधिहरू, भल्मन्सा, पत्रकार, र सुरक्षा निकायका सदस्यहरूको उल्लेखनीय उपस्थिति रहेको थियो।

नेपाल पन्छी संरक्षण संघ (BCN) र कञ्चनपुर पन्छी संरक्षण समूहको संयुक्त आयोजनामा गरिएको यस कार्यक्रममा ताल र सिमसार क्षेत्रमा पाइने चरा प्रजातिहरूको संरक्षण, उनीहरूको जैविक महत्व, र संरक्षणका प्रभावकारी उपायहरूबारे विशेष छलफल गरिएको थियो।

कार्यक्रम सफल बनाउन योगदान पुर्याउनेहरूलाई विशेष धन्यवाद दिइएको थियो। कञ्चनपुर पन्छी संरक्षण समूहका अध्यक्ष सन्देश चौधरी, दिलमाया चौधरी, सञ्जीव चौधरी, मनिषा चौधरी, करण चौधरी, सञ्जिता चौधरी, अस्मिता चौधरी, सुबिना चौधरी, रिमा चौधरी, अभिषेक चौधरी, अमित चौधरी, बबिता चौधरीलगायतका सहयोगीहरूलाई धन्यवाद दिइएको थियो।

कार्यक्रमको समापनमा सहभागीहरूले सिमसार क्षेत्रको संरक्षणमा सक्रिय भूमिका निर्वाह गर्ने प्रतिबद्धता व्यक्त गरे। आयोजक संस्थाहरूले यस्ता सचेतनामूलक कार्यक्रमलाई निरन्तरता दिने घोषणा गरेका छन्।