कञ्चनपुर: बेलौरी नगर भलमन्सा समितिको बखेरी कार्यक्रम सम्पन्न,अध्यक्षमा पुनः अमर चौधरी ,

दिप न्यूज

समाचार प्रकाशित मिति :

२३ बैशाख २०८२, मंगलवार १७:०२

नवराज अवस्थी, बैशाख २३, बेलौरी कञ्चनपुर, — कञ्चनपुर जिल्लाकाे बेलौरी नगरपालिकामा नगर भलमन्सा समितिको बखेरी कार्यक्रम सम्पन्न भएको छ। मंगलबार बेलौरी नगरपालिकाको आयोजनामा र नगर भलमन्सा समितिको सहजीकरणमा नगरपालिकाको कार्यक्षेत्रभित्र रहेका भलमन्सा प्रणालीको संरक्षण, प्रवर्द्धन र विकास गर्न तयार गरिएको भलमन्सा ऐन २०७८ को दफा ६ बमोजिम नगरप्रमुख पोतेलाल चौधरी को प्रमुख आतिथ्यतामा नगर बखेरी कार्यक्रम सम्पन्न भएको हाे।

यस भेलाबाट अमर चौधरीलाई पुनः सर्वसम्मत रूपमा नगर भलमन्सा (अध्यक्ष) पदमा निर्वाचित गरिएको छ।समितिको सह-भलमन्सा पदमा गुरु प्रसाद चौधरी र सुरेश कुमार वडायक चयन भएका छन् भने सचिवको जिम्मेवारी विक्रम बखरियाले सम्हाल्नेछन्।

कार्यक्रममा नगर प्रमुख पोतेलाल चौधरीले भलमन्सा ऐन का उद्देश्य र महत्वबारे जानकारी दिँदै यस ऐनको कार्यान्वयनले स्थानीय तहमा मेलमिलाप, आपसी समझदारी र विवाद समाधान प्रक्रियामा महत्वपूर्ण भूमिका खेल्ने कुरा स्पष्ट पारे। नगर भलमन्सा समितिको कार्यशैलीलाई अझ प्रभावकारी बनाउने र स्थानीय समाजमा न्याय र समानताको वातावरण सिर्जना गर्ने कार्यमा सहयोग पुर्याउने दृढ प्रतिबद्धता व्यक्त गर्दै उहाँले यस ऐनको सफल कार्यान्वयनका लागि सबै पक्षको सहकार्य अपेक्षि गरिएको बताए।

कार्यक्रममा नगरका विभिन्न वडाका भलमन्सा सदस्यहरू, समाजसेवी, बुद्धिजीवी, स्थानीय अगुवा र नागरिकहरूको उल्लेखनीय उपस्थिति रहेको थियो। सहभागीहरूले भलमन्सा समितिको कार्यसमितिलाई बधाई दिँदै यस ऐनको प्रभावकारी कार्यान्वयनका लागि शुभकामना व्यक्त गरे।